La Llei 4/2006 de Cooperación al desarrollu, en so artículo 11 (Modalidaes) establez que la Cooperación podrá llevase a bon fin pola Alministración del Principáu d'Asturies, bien directamente o indirectamente, a través de les
Organizaciones Non Gubernamentales de desarrollu (ONGD), organismos internacionales o per aciu d'entidaes públiques o privaes qu'actúen nesti ámbitu, emplegando cualesquier de los siguientes instrumentos:
a) Asistencia técnica.
b) Concesión de subvenciones. c) Programes d'acción humanitaria. d) Educación y sensibilización social.
El Plan Director 2009-2012 establez una distinción ente modalidaes, atendiendo a la tipoloxía o naturaleza de los proyectos, ya instrumentos, que faen referencia a les ferramientas o mecanismos que s'empleguen pa canalizar l'ayuda.
8.1. Modalidaes
8.1.1. PROEYECTOS DE DESARROLLU
La modalidá de proyectos de desarrollu ye la qu'engloba'l conxuntu d'intervenciones sobre'l terrén que se promueven en dalgún de los sectores numberaos nel apartáu rellativu a les prioridaes sectoriales: necesidaes sociales básiques, gobiernu y sociedá civil, apoyu a procesos productivos y de xeneración d'ingresos, muyer y desarrollu, mediu ambiente, promoción y defensa de los Derechos Humanos, defensa de la indentidá cultural y promoción de los pueblos indíxenes.
Durante'l periodu de vixencia del Plan Cuatrienal 2004-2007, foi la modalidá que más recursos económicos movilizó, y asina siguirá siendo durante los años de vixencia del Plan Director 2009-2012.
Los proyectos de desarrollu tarán orientaos a procesos que sean viables dende un puntu de vista institucional, sociocultural, económico-financieru, tecnolóxicu y medioambiental. Han ser coherentes coles polítiques de cooperación tanto del donante como del receptor y han integrar de forma equilibrada y coherente toles prioridaes tresversales que s'espunxeron. Too ello, con una lóxica orientada al desarrollu caltenible.
8.1.2. ACCIÓN HUMANITARIA
Los programes d'Acción Humanitaria constituyen una modalidá descrita nel artículo 14 de la Llei Asturiana de Cooperación al desarrollu, y tarán orientaos a l'asistencia a poblaciones en situación de emerxencia, vulnerabilidá o de grave ya inminente riesgu. Polo tanto, son actuaciones dirixíes:
• A la ayuda a les víctimas de desastres, o a poblaciones en situación de emerxencia, de vulnerabilidá estrema o conflictos crónicos, orientaes a garantizar la so subsistencia, protexer los sos derechos, defende rla so dignidá y sentar les bases del so posterior desarrollu.
• A la rehabilitación y reconstrucción de les infraestructures físiques, económiques y sociales, y a la prevención y reducción de la situación de vulnerabilidá de comunidaes y poblaciones víctimes de desastres del tipu que fuere.
• A la ayuda alimentaria y sanitaria.
• A l'asistencia a refuxaos y desplazaos internos por motivu de conflictos armaos, guerres o catástrofes, cuando la so situación s'allargue nel tiempu, a la prevención de desastres, a la denuncia de violaciones de los derechos Humanos asociada davezu a estos colectivos, y a proyectos de defensa de los mesmos.
Demientres la vixencia del Plan Director 2009-20012, na modalidá d'Acción Humanitaria, la estratexa d'actuación tendrá n'especial consideración los siguientes criterios:
• Coherencia coles prioridaes formulaes nel Plan Director 2009-2012. Pese al carácter singular inherente a la mayor parte de les intervenciones d'Acción Humanitaria, nes que l'asistencia énte una situación d'emerxencia o post-emerxencia prima sobre otros factores más lligaos al conceptu de desarrollu caltenible, tendránse en cuenta los siguientes planteamientos:
- Fortalecimientu de les capacidaes llocales.
- Participación de la población beneficiaria y afayamientu a la realidá socio cultural.
- Equidá de xéneru. - Sotenibilidá ambiental.
- Enfoque de derechos, tanto civiles como sociales. - Trabayu en pos de la construcción de paz.
• Tendencia hacia la especialización.
La intervención eficaz nel ámbitu de l'Acción Humanitaria, n'especial na ayuda d'emerxencia, nun ta al algame de cualesquier organización, polo que se tenderá al establecimientu de criterios que garanticen solvencia técnica y la esperiencia daquélles que la vayan llevar a cabu. • Creación d'instrumentos específicos pa esta modalidá.
En llinia col anterior planteamientu, estudiaráse la posibilidá de poner en marcha una convocatoria de subvenciones abierta y de contino, específica pa proyectos d'Acción Humanitaria, a la que podrán concurrir ONGD que cumplan los requisitos d'esperiencia y probada capacidá nesti ámbitu.
les distintes Alministraciones y la sociedá civil asturiana.
• Promoción d'acciones de testimoniu, denuncia, defensa y promoción del Derechu Internacional Humanitariu.
8.1.3. EDUCACIÓN Y SENSIBILIZACIÓN SOCIAL
La educación y sensibilización social ye tamién una modalidá descrita nel artículu 15 de la Llei Asturiana de Cooperación al desarrollu, y comprenderá'l conxuntu d'acciones que se desarrollen pela Alministración del Principáu d'Asturies y los restantes axentes de cooperación, directamente o en colaboración, pa promover una meyor percepción per parte la sociedá asturiana de los problemas que afecten a los países en desarrollu y qu'estimula la solidaridá y cooperación activa colos mesmos, pela vía de campañes de divulgación, programes formativos y apoyu a les iniciatives en favor de la cooperación al desarrollu nes sos diferentes manifestaciones y de la promoción de los Derechos Humanos.
L'acompañamientu y la collaboración nos proyectos de desarrollu impliquen necesariamente un impactu na sociedá propia, modificando estilos de vida y pautes de comportamientu personales y sociales, qu'afecten a los procesos y a les rellaciones internacionales colos países en desarrollu. Nesti sentíu, la educación pal desarrollu y la sensibilización social ha ser un elementu central de la Cooperación Asturiana.
Durante'l periodu de vixencia del Plan Director 2009-2012, trabayaráse col oxetivu de consolidar la Educación pal desarrollu como materia tresversal nos programes d'estudiu de la enseñanza obligatoria nel marcu de la educación en valores, favoreciendo la rellación ente l'estamentu docente y les ONGD pa la Ellaboración y adaptación de conteníos a les realidades pedagóxiques de cada nivel educativu.
Nel ámbitu universitariu promoveránse estudios de Postgráu, d'Especialidá y de Master, en materia de cooperación al desarrollu, solidaridá y defensa y promoción de los Derechos Humanos, en collaboración cola Universidá d'Uviéu.
No referente a la sensibilización social, priorizaránse acciones que contribuyan a la promoción d'una ciudadanía responsable y solidaria que, de forma activa, tome conciencia de les diverses realidaes coexistentes ya involucraes nos procesos de desarrollu de los países emprobecíos y de so llucha escontra les causes de la probeza na que s'alcuentren asitiaos. Según el tipu d'intervención podrá tratarse de cursos, xornaes o seminarios, talleres, ellaboración y difusión de materiales formativos o divulgativos, y tamién campañes qu'empleguen toes o delles de les canales enantes mentaes. Acordies cola temática, estos proyectos podrán tratar situaciones como la problemática Norte Sur, en xeneral o en dalguna zona xeográfica determinada, la formación en valores, la formación en Derechos Humanos, la denuncia sobre les situaciones de inxusticia,….
Según el públicu destinatariu, podrá distinguise ente acciones específicamente orientaes a ciertos sectores de población (comunidá educativa, profesionales y voluntariao vinculaos al mundu de la cooperación o otros), o bien a la sociedá asturiana en so conxuntu.
8.2. Instrumentos
L'asistencia técnica sedrá l'instrumentu utilizáu cuando la cooperación se faga en términos de tresferencia de recursos Humanos, recursos materiales o tecnoloxía y conocimientos, ensin qu'exista un fluxu financieru ente'l Principáu d'Asturies y les entidaes o persones beneficiaries.
Les subvenciones son tamién instrumentos, que se podrán articular mediante dos mecanismos complementarios:
La Convocatoria Pública de Subvenciones pa ONGD con presencia social nel Principáu d'Asturies.
Esta convocatoria tendrá carácter añal, y contemplará al menos tres llinies de financiación: Proyectos de desarrollu, Acción Humanitaria y Educación y Sensibilización Social. Al empar, los oxetivos tarán orientaos a la meyora de les condiciones de vida de les poblaciones beneficiaries con una óptica de sotenibilidá. Tarán focalizaos en dalgún de los sectores a los que se fai referencia nes prioridades sectoriales d'esti Plan.
Les subvenciones directes a entidades públiques o NGD, tanto asturianes como de los países receptores de la Cooperación.
Podrán articulase a través de Convenios o otros instrumentos alministrativos que se determinen, ya igualmente tarán orientaes a financiar Proyectos de desarrollu, Acción Humanitaria o Educación y Sensibilización Social.
Nun se descarta durante'l periodu de vixencia del Plan Director 2009-2012, l'estudiu de dalgún otru instrumentu que pueda complementar a los anteriores y valga pa meyorar la calidá de l'ayuda, siempre dientro del espíritu de la Llei Asturiana de Cooperación al desarrollu, y en consensu colos principales actores de la cooperación.
Reafírmase'l compromisu col emplegu en tolos casos d'instrumentos d'ayuda non reembolsable. En dengún casu l'actuación de l'Axencia Asturiana de Cooperación al Desarrollu responderá a intereses económicos, comerciales o d'investigación, o a intereses particulares de les entidaes promotores, que traten d'instrumentalizar la supuesta ayuda hacia fines que nun seyan los contemplaos nel Plan Director 2009-2012.
•
9. ACTORES DE LA COOPERACIÓN ASTURIANA
Sedrán axentes de la Cooperación Asturiana aquelles entidaes, de carácter públicu o priváu, que tienen una vinculación específica coles xeres de cooperación al desarrollu, solidaridá internacional y defensa y promoción de los derechos humanos, en concreto:
Les alministraciones públiques asturianes y restantes entidaes públiques entellazaes con elles.
Les ONGD.
Igualmente, consideraránse axentes de cooperación: la Universidá d'Uviéu, les organizaciones sindicales y les entidaes ensin ánimo de llucru que realicen acciones de cooperación al desarrollu, solidaridá internacional y defensa y promoción de los derechos Humanos y compartan, dende la pluralidá y la diversidá, los oxetivos y principios rectores que contempla esti Plan.
L'Axencia Asturiana de Cooperación al Desarrollu reconoz de forma especial a la Coordinadora Asturiana de ONGD, como entidá qu'integra n'horizontal a una parte importante de les ONGD d'Asturies, represéntales y promueve'l trabayu en rede ente les mesmes, y como actor indispensable nel procesu d'educación y sensibilización de la sociedá asturiana.
L'Axencia Asturiana de Cooperación al Desarrollu mantendrá un diálogu permanente cola Coordinadora Asturiana de ONGD col oxetivu de consensuar, fortalecer, diseñar y executar, con coherencia y eficacia, les polítiques de cooperación al desarrollu, solidaridá internacional y defensa y promoción de los derechos humanos
10. RECURSOS HUMANOS Y MATERIALES.